Gjykata Komerciale e Kosovës, Dhomat e Shkallës së Parë, ka marrë një vendim në një çështje administrative midis kompanisë “Limak Kosovo International Airport J.S.C Adem Jashari” dhe Ministrisë së Punës dhe Mirëqenies Sociale. Vendimi i gjykatës anuloi në tërësi aktet administrative të Inspektoratit të Punës që kërkonin anulimin e vendimeve për mosvazhdim të marrëdhënieve të punës së punonjësve të Limakut, shkruan Demokracia.com.
Në një vendim të datës 12 korrik 2024, gjykata ka aprovuar kërkesën e paditësit, “Limak Kosovo International Airport J.S.C Adem Jashari”, duke anuluar vendimet e Inspektorit të Punës që synonin të shfuqizonin 23 vendime për mosvazhdim të marrëdhënieve të punës dhe 28 njoftime të ngjashme. Ky vendim vlerëson se Inspektorati i Punës ka tejkaluar kufijtë e kompetencës së tij ligjore, duke marrë vendime që mbi tejkalojnë autoritetin e përcaktuar nga ligji.
Në padi, Limak Kosovo International Airport ka argumentuar se vendimet e Inspektorit të Punës janë në kundërshtim me Ligjin Nr. 03/L-212 të Punës dhe Ligjin Nr. 2002/9 për Inspektoratin e Punës, të cilët qartësojnë kompetencat ekskluzive të gjykatave në trajtimin e kontesteve të punës. Sipas paditësit, Inspektorati i Punës nuk ka autorizim për të anuluar vendimet e marrëdhënieve të punës, pasi kjo është përgjegjësi e gjykatave sipas parimeve të qarta ligjore, raporton Demokracia.com.
Gjykata, duke analizuar dispozitat e Ligjit të Punës dhe Ligjit për Inspektoratin e Punës, ka konstatuar se Inspektorati i Punës nuk posedon kompetencë gjyqësore për të anuluar vendimet e paditësit. Në vend të kësaj, vetëm gjykatat kanë autoritetin për të vlerësuar dhe anuluar vendimet administrative në kontekstin e marrëdhënieve të punës.
Vendimi i gjykatës thekson rëndësinë e respektimit të ndarjes së pushteteve dhe kompetencave ndërmjet institucioneve administrative dhe gjykatave, duke siguruar që çdo akt administrativ të jetë në përputhje me kufizimet ligjore të vendosura.
Vendimi plotë:
