I dërguari i posaçëm i Shteteve të Bashkuara për Ballkanin Perëndimor, Gabriel Escobar, ka thënë se me themelimin e Asociacionit të Komunave me Shumicë Serbe, SHBA-ja dëshiron që të zhbëhet ajo që Serbia po bën në veri të Kosovës.
Kështu ka thënë ai gjatë një seance dëgjimore në Komitetin për Marrëdhënie me Jashtë në Senatin amerikan me temën “Vlerësimi i Politikës së ShBA-së ndaj Ballkanit Perëndimor”.
“Themelimi i Asociacionit është një zotim i cili është bërë në marrëveshjen e Brukselit. Por, ne vazhdimisht i kemi thënë Kosovës se ne do ta ndihmojmë atë që ta formësojë Asociacionin në diçka që është model evropian që nuk e pengon sovranitetin e shtetit, strukturën e Kushtetutës ose funksionalitetin e shtetit.
“Mënyra se si ne e shohim, Asociacioni është një rrugë për t’i bashkuar katër komuna për të mundur që të ofrojnë shërbime komunale për minoritetet në gjuhën serbe”, deklaroi Escobar.
“Ne do të dëshironim që ta përdorim Asociacionin për ta zhbërë atë që Serbia po bën në veri të Kosovës dhe ta fusim [veriun] në strukturën e Kosovës, që ata [Kosova] ta kontrollojë dhe është nën ligjet e Kosovës”, raporton Klankosova.tv.
“Pra unë nuk e shoh si mjet të Serbisë, e shoh si një mënyrë për Kosovën që t’i akomodojë këta qytetarë që jetojnë në Kosovë”, deklaroi i Dërguari i SHBA-së për Ballkanin Perëndimor, Gabriel Escobar.
