Këshilli Gjyqësor i Kosovës (KjK) në takimin e 309-të, të mbajtur të enjten, ka zgjedhur gjyqtaren Vera Gashi – Bala dhe gjyqtarin Arben Toska për të punuar në dhomën e shkallës së parë të Gjykatës Komerciale.
Mandati i dy gjyqtarëve në Gjykatën Komerciale do të fillojnë nga 1 qershori 2023, raporton “Betimi për Drejtësi”.
Të gjithë anëtarët e KGjK-së, në mënyrë unanime kanë votuar që dy gjyqtarët e lartcekur ti bashkohen Gjykatës Komerciale.
Kjo pasi paraprakisht, anëtarja Teuta Ibrahimi para anëtarëve të KGjK-së ka paraqitur raportin e Komisionit për vlerësimin e kandidatëve për gjyqtarë të Gjykatës Komerciale.
Ndër të tjera, anëtarja Ibrahimi ka thënë se dy kandidatët e lartcekur janë rekomanduar nga anëtarët e komisionit për votim në KGjK.
Gjyqtarja Vera Gashi – Bala, më herët ka shërbyer si gjyqtare në Gjykatën Themelore në Prizten- Dega në Suharekë, ndërsa gjyqtari Arben Toska më herët ka shërbyer si gjyqtar në Gjykatën Themelore në Ferizaj – Dega në Kaçanik.
Ndryshe, më 9 shkurt 2023 ishte shpallur konkursi i brendshëm për tre gjyqtarë të Gjykatës Komerciale, për tri pozita të dhomës së shkallës së parë të kësaj gjykate.
