Dua Lipa ka dëshmuar edhe një herë se moda mbetet pjesë e pandashme e paraqitjeve të saj publike, teksa u fotografua të enjten në aeroportin JFK të New Yorkut, duke u larguar nga qyteti me një kombinim elegant dhe një aksesor që mori gjithë vëmendjen.
Këngëtarja 30-vjeçare zgjodhi një stil të frymëzuar nga Riviera, me një pulovër me vija dhe zinxhir të shkurtër të kombinuar me xhinse, ndërsa pjesën më të spikatur të paraqitjes e përbënte një çantë e madhe me vija nga Chanel.
Çanta është pjesë e koleksionit Cruise 2027 të shtëpisë franceze të modës, të prezantuar në Biarritz të Francës në prill.
Koleksioni konsiderohet si debutimi i parë “Cruise” i drejtorit kreativ Matthieu Blazy për Chanel.
Dua Lipa dhe lidhja e saj me Chanel
Blazy kishte drejtuar Bottega Veneta nga viti 2021 deri më 2024, përpara se t’i bashkohej Chanel në dhjetor të vitit 2024.
Stilisti i Dua Lipës, Lorenzo Posocco, kishte folur më herët me entuziazëm për ardhjen e tij në shtëpinë franceze.
“Një nga debutimet më emocionuese ishte ai i Matthieu Blazy për Chanel. Ne e duam Matthieu. Më pëlqente shumë vizioni i tij te Bottega Veneta dhe tani po sjell një frymë të re në Chanel, diçka që ishte e nevojshme”, kishte deklaruar ai në qershor.
Dua prej kohësh ka një raport të afërt me markën dhe shpesh zgjedh krijimet e Chanel për paraqitjet e saj publike.
Në New York për të mbështetur Callum Turner
Këngëtarja ndodhej në New York për të mbështetur bashkëshortin e saj, Callum Turner, në premierën e filmit të tij të ri “One Night Only”.
Çifti u martua më herët gjatë verës dhe më pas kaloi muajin e mjaltit në disa destinacione evropiane, përpara se të rikthehej në Shtetet e Bashkuara për angazhimet profesionale të Turner.
Aktori luan në filmin romantik “One Night Only” përkrah Monica Barbaro.
Dua, ndërkohë, është rikthyer së fundmi në studio për të punuar në muzikë të re, pasi më herët kishte marrë pjesë së bashku me bashkëshortin në finalen e Kupës së Botës.
Callum Turner angazhohet në një tjetër projekt
Turner është parë gjithashtu javën e kaluar duke xhiruar në New Jersey së bashku me Margaret Qualley për filmin e ardhshëm “Possession”.
Projekti është një version i ri i filmit kult të vitit 1981 dhe po drejtohet nga Parker Finn, krijuesi i serisë “Smile”.
Filmi pritet të dalë vitin e ardhshëm.
Dasmë në Londër, festë madhështore në Sicili
Sipas shkrimit, Dua Lipa dhe Callum Turner e kurorëzuan ligjërisht martesën në Old Marylebone Town Hall në Londër.
Më pas, çifti organizoi një festë luksoze triditore në Palermo të Sicilisë, ku mes momenteve më të veçanta ishte edhe një performancë private nga Elton John.
Pas rikthimit në New York javën e kaluar, Dua e përshkroi muajin e mjaltit me Callum si “parajsë në tokë”, duke publikuar një seri fotografish në Instagram.
Mes imazheve ishte edhe një fotografi intime nga La Posta Vecchia, një vilë e periudhës së Rilindjes pranë Romës, e cila dikur kishte qenë rezidencë bregdetare e miliarderit J. Paul Getty.
Çifti kishte qëndruar në të famshmen Getty Suite, me pamje nga Deti Tirren dhe një banjë të madhe prej mermeri.
Pas dasmës, muajit të mjaltit dhe rikthimit në studio, Dua Lipa duket se po hyn në një periudhë të re si në jetën personale, ashtu edhe në karrierë, pa hequr dorë nga stili që e ka kthyer në një nga figurat më të ndjekura të modës dhe muzikës.
