Ministri në detyrë i Zhvillimit Rajonal, Fikrim Damka, në një deklaratë para fillimit të seancës, ka folur në lidhje me ngritjen e aktakuzës ndaj tij dhe ushtruesit të detyrës së sekretarit të kësaj ministrie, të cilët dyshohen për keqpërdorim të detyrës zyrtare që, sipas Prokurorisë, i ka shkaktuar buxhetit të Kosovës një dëm mbi 1 milion euro.
Në një deklaratë për media, Damka ka thënë se nuk ka pranuar ende asnjë ftesë nga ndonjë gjykatë në Kosovë dhe se nuk mund të komentojë aktakuzën pa e parë atë.
“Së pari unë si ministër në detyrë nuk kam marrë as një ftesë prej as një gjykate në Kosovë. Nuk mund ta komentoj pa e lexuar aktakuzën, kur e lexojmë aktakuzën, kur thirremi nga gjykata do të paraqitem me plotë vullnetin”, tha ai.
Ai është shprehur i bindur se nuk ka pasur shkelje ligjore apo keqpërdorim të detyrës në punën e tij si ministër.
“Jam i bindur që nuk ka pasur as një shkelje ligjore, as një keqpërdorimi i as një vendi të Republikës së Kosovës”, tha ai.
Damka ka kritikuar mediat dhe një parti opozitare për, siç ka thënë ai, elaborimin e çështjes në publik pa pasur një dosje të konfirmuar.
“Është shqetësues të elaborohet nga mediat, apo nga një parti e opozitës që ka elaboruar dosjen që ne nuk e kemi elaboruar. Por faktet dhe dëshmitë do t’i paraqesim në Gjykatë,” përfundoi ai.
Prokuroria Themelore në Prishtinë njoftoi më 4 korrik se ka ngritur aktakuzë ndaj dy zyrtarëve të Ministrisë së Zhvillimit Rajonal për keqpërdorim të mbi një milion eurove nga buxheti i shtetit, përmes subvencioneve të ndara gjatë periudhës 2020–2022.
