Ukraina ka refuzuar propozimin e ri amerikan për kompromis territorial, i cili synonte zhbllokimin e negociatave të paqes me Rusinë. Sipas gazetës britanike The Telegraph, plani i propozuar nga të dërguarit e presidentit Donald Trump që parashikonte që Moska të merrte kontrollin e plotë mbi vijën e frontit në rajonin e Donbasit, pa qenë e nevojshme që Kievi të dorëzonte qytetet që ende kontrollon në këtë zonë, është refuzuar.
Propozimi amerikan synonte të gjente një zgjidhje për çështjen territoriale, e cila mbetet pengesa kryesore në negociatat mes palëve. Rusia kërkon që Ukraina të heqë dorë nga rreth 2 mijë milje katrorë territor në Donetsk dhe Luhansk, zona që ushtria ruse nuk ka arritur t’i pushtojë plotësisht.
Megjithatë, Kievi ka bërë të qartë se nuk do të pranojë asnjë lëshim territorial. Një burim ukrainas pranë negociatave deklaroi për The Telegraph se delegacioni ukrainas nuk ka diskutuar asnjëherë për dorëzimin e territoreve të pushtuara nga Rusia, duke theksuar se Ukraina nuk do t’i njohë ato humbje, as në mënyrë faktike dhe as ligjërisht.
Ndërkohë, negociatat mes Ukrainës dhe Rusisë rifilluan të martën në Abu Dhabi, pas një ndërprerjeje në procesin e ndërmjetësuar nga Shtetet e Bashkuara. Takimet u zhvilluan nën ndërmjetësimin e Jared Kushner dhe Steve Witkoff, të dërguar të Trump.
Presidenti ukrainas, Volodymyr Zelensky i cilësoi bisedimet si konstruktive dhe me përmbajtje konkrete, duke theksuar se palët diskutuan garancitë afatgjata të sigurisë dhe çështjet humanitare, veçanërisht lirimin e të burgosurve.
Megjithatë, përfshirja e vendeve evropiane në proces mbetet një tjetër pikë mosmarrëveshjeje. Përfaqësuesit evropianë u detyruan të largoheshin nga salla përpara nisjes së takimit me delegacionin rus, pasi Moska kundërshtoi pjesëmarrjen e tyre.
