Presidenti amerikan Joe Biden vlerësoi se një armëpushim në Gaza është i nevojshëm sepse situata do të bëhet “shumë e rrezikshme” në Izrael nëse armiqësitë vazhdojnë gjatë muajit të shenjtë mysliman të Ramazanit, i cili do të fillojë më 10 ose 11 mars.
“Është në duart e Hamasit”, tha Biden në një fjalim të shkurtër para gazetarëve, duke iu përgjigjur vetëm disa pyetjeve përpara se të hipte në aeroplan.
Biden shtoi se izraelitët ishin bashkëpunues dhe se një propozim “i arsyeshëm” ishte në tryezë për të lejuar lirimin e pengjeve të ndjekur nga një ndërprerje e armiqësive.
Bisedimet e zhvilluara në Kajro për armëpushimin u ndërprenë pa rezultat, por delegacioni i Hamasit njoftoi se do të qëndronte edhe një ditë me kërkesë të negociatorëve, për të vazhduar.
Kanë mbetur vetëm pak ditë për t’i dhënë fund armiqësive para fillimit të Ramazanit.
Presidenti amerikan përsëriti gjithashtu se më shumë ndihma duhet të arrijë në Gaza, e cila është prekur nga një krizë serioze humanitare, dhe shtoi se nuk ka “asnjë justifikim” pse ndihma nuk mund të arrijë, në një vërejtje që synon Izraelin. Ai shtoi se po punon shumë për këtë me autoritetet izraelite./abcnews.al/
