Kryetarja e parlamentit serb, Ana Bërnabiq, ka pretenduar “se nuk ka kërcënim më të madh për serbët në Kosovë sesa kryeministri i Kosovës, Albin Kurti”, raportojnë mediat serbe.
“Për mua është jashtëzakonisht e rëndësishme të theksoj se mendoj se në asnjë kohë nuk kishte kërcënim më të madh për serbët e Kosovës se Albin Kurti. Çështja më e rëndësishme për ne është çështja e Kosovës. Dhe a janë serbët nga Kosova fajtorë për tërbimin e Kurtit? Nuk janë. Ndërsa disa thonë se Vuçiqi është fajtor që Kurti po arreston serbët në Kosovë”, ka pretenduar Bërnabiq.
Ajo ka thënë se “Kosova nuk ka qenë asnjëherë temë për opozitën apo ish-qeverinë në Serbi”, duke shtuar se “në vitin 2004 ata kanë lejuar dëbimin e serbëve nga Kosova, si dhe djegien e kishave dhe manastireve”.
Bërnabiq ka shtuar se shkëputja e Malit të Zi në vitin 2006 ishte një parakusht që Kosova të shpallte pavarësinë dhe se shteti më pas veproi sikur të ishte i lehtësuar.
