Harry Kane shënoi golin e tij të parë në Bundesliga këtë sezon, teksa Bayern Munichu i rezistoi Elversbergut luftarak në një fitore të vështirë 2–1 në transfertë, duke e zgjatur fillimin e pamposhtur të sezonit në gjashtë ndeshje në të gjitha garat (5 fitore, 1 barazim).
Elversbergu, që e kishte nisur sezonin e tij të parë në histori në Bundesliga me dy fitore radhazi, tregoi shumë dëshirë në fazat e para në “Waldstadion Kaiserlinde”, por iu dha një demonstrim i rrezikut të Bayernit kur Lennart Karl e testoi Nicolas Kristofin nga distanca, pas një kombinimi të bukur me Kanen.
Elversbergu nuk e mori seriozisht atë paralajmërim, pasi Karl zhbllokoi rezultatin pak para se të mbushej gjysmë ore lojë, duke e dërguar topin në rrjetë nga afërsia pas krosimit të ulët të Ismael Saibarit, i cili gjeti rrugën deri te shtylla e largët.
Bayerni për pak sa nuk e shpërdoroi epërsinë e ngushtë kur një goditje me kokë e pasaktë e Aleksandar Pavlovićit i hapi rrugën Cole Campbellit për të shënuar ndaj Jonas Urbigut, por një pozicion jashtë loje përfundimisht e shpëtoi mesfushorin nga turpi dhe ia mohoi amerikanit një gol të famshëm.
Kjo rezultoi të ishte ndërhyrja e fundit e rëndësishme e Campbellit në ndeshje, përpara se të zëvendësohej nga Maurice Krattenmacher, i cili u largua nga Bayerni për t’iu bashkuar Elversbergut gjatë verës. 21-vjeçari iu deshën pak më shumë se 15 minuta për t’i “përndjekur” ish-punëdhënësit e tij, vetëm pak çaste pasi një gol i Kanes ishte anuluar për pozicion jashtë loje. Duke përfituar nga hapësira e madhe në hyrje të zonës, Krattenmacher e sistemoi topin në këmbën e djathtë për të krijuar këndin dhe më pas goditi në mënyrë të pandalshme drejt këndit të sipërm.
Fatkeqësisht për vendasit, barazimi i papritur vetëm sa e zemëroi Bayernin, i cili menjëherë rriti ritmin, teksa Michael Olise pa një goditje të tijën të larguar me dëshpërim nga vija e portës, përpara se një tjetër goditje e tij të përfundonte në traversë në përpjekjen për ta paraboluar Kristofin.
Megjithatë, nuk ishte Olise, por Kane ai që u bë heroi i Bayernit, duke e rikthyer epërsinë me golin e tij të katërt në ndeshjet zyrtare këtë sezon. Kapiteni i Anglisë mori topin në një zonë të mbipopulluar dhe, me disa prekje të qeta, krijoi hapësirën për goditje, e cila përfundoi pas Kristofit në shtyllën e afërt.
Goli i Kanes në minutën e 72-të rezultoi vendimtar në përballjen e parë zyrtare mes dy skuadrave, duke e ngjitur skuadrën e Vincent Kompanyt në vendin e katërt dhe duke e zbritur ekipin vendas në pozitën e gjashtë.
