Alice Maselli, ish-partnerja e finalistit të “Big Brother VIP Kosova 4”, Klodit, ka reaguar ndaj komenteve dhe kritikave që mori në rrjetet sociale pasi publikoi një video në TikTok me partnerin e saj të ri.
Postimi nxiti menjëherë reagime nga ndjekësit, ndërsa një prej tyre e kritikoi duke pretenduar se Alice kishte nisur shumë shpejt një lidhje të re.
Maselli vendosi të mos e linte komentin pa përgjigje dhe publikoi një sqarim të gjatë, duke theksuar se kanë kaluar disa muaj nga përfundimi i marrëdhënies së saj të mëparshme dhe se ndjenjat nuk mund të planifikohen.
“Jam mirënjohëse që pata forcën të rihap zemrën”
Alice u shpreh se pas një periudhe të vështirë është mirënjohëse që ka gjetur forcën për të vazhduar jetën dhe për t’i dhënë vetes një mundësi të re në dashuri.
Edhe pse nuk e përmendi drejtpërdrejt Klodin, reagimi i saj u interpretua si referencë ndaj marrëdhënies së tyre të kaluar.
Ajo theksoi se gjatë gjithë kësaj kohe ka zgjedhur të mos flasë publikisht për detajet e ndarjes dhe të mos sulmojë askënd.
“Me zgjedhjen time kam shmangur gjithmonë të flas, por ju siguroj se në atë situatë, të kesh forcën të ecësh përpara me pjekurinë që pata unë dhe pa baltosur askënd, nuk është diçka që mund ta bëjë kushdo”, shkroi ajo.
U kërkon ndjekësve të mos gjykojnë pa e ditur të vërtetën
Maselli u bëri thirrje ndjekësve të shmangin spekulimet dhe gjykimet për një histori, detajet e së cilës, sipas saj, nuk i dinë.
“Nuk mendoj se jam unë personi që duhet të komentoni. Më lini të jetoj jetën time në paqe”, shtoi ajo.
Me këtë reagim, Alice la të kuptohet se pas ndarjes mund të ketë pasur rrethana që nuk janë bërë publike, por pa dhënë detaje të tjera.
Edhe më herët kishte kërkuar të mos përfshihej në historinë e Klodit
Kjo nuk është hera e parë që Alice Maselli reagon ndaj ndjekësve lidhur me ish-partnerin e saj.
Disa javë më parë, ajo kishte treguar se disa persona i dërgonin vazhdimisht fotografi të Klodit dhe Elijonës, duke i kërkuar publikisht që të ndalonin.
“Djema, sinqerisht jeni bërë të padurueshëm. Keni zero respekt. Shkoni dhe komentoni në TikTok-et e tyre dhe jo në të miat. Unë kam ecur përpara, faleminderit”, kishte shkruar ajo.
Alice tashmë po përpiqet të mbajë jetën e saj private larg historive të së kaluarës, duke kërkuar nga publiku që të respektojë zgjedhjet e saj dhe marrëdhënien e re.
