Trent Alexander-Arnold raportohet se ka marrë një vendim lidhur me mundësinë e largimit nga Real Madridi në janar, pasi edhe një herë u detyrua ta shikonte nga banka rezervë pjesën më të madhe të fitores 2-1 të “Los Blancos” ndaj Barcelonës.
Dy golat e Kylian Mbappes i siguruan skuadrës së Jose Mourinhos një fitore të rëndësishme në garën për titullin e La Ligës, ndërsa “Special One” riktheu kujtimet e vjetra duke festuar me rrëshqitjen klasike në gjunjë.
Ndërsa Mbappe dhe shumica e lojtarëve të Realit do të jenë të kënaqur me tri pikët, që pas 10 ndeshjeve e afrojnë skuadrën në vetëm tri pikë larg Barcelonës, Alexander-Arnold mund të mos jetë edhe aq i lumtur.
Mourinho vendosi ta aktivizonte mesfushorin e tij të zakonshëm, Fede Valverde, në pozitën e mbrojtësit të djathtë, pavarësisht se Denzel Dumfries dhe Alexander-Arnold ishin të gatshëm për të luajtur nga minuta e parë.
Holandezi u inkuadrua në lojë kur kishin mbetur pak më pak se 30 minuta deri në fund, ndërsa anglezit iu desh të priste deri në minutën e 94-t për të bërë paraqitjen e tij.
28-vjeçari, i cili iu bashkua Real Madridit nga Liverpooli në vitin 2025, ka hasur vështirësi për të siguruar një vend në formacionin titullar nën drejtimin e Mourinhos.
Nga shtatë paraqitjet e tij këtë sezon, vetëm në tri prej tyre ka luajtur nga minuta e parë. Ai gjithashtu ka startuar vetëm në 17 ndeshje të ligës që prej transferimit te madrilenët.
Si rezultat, mbrojtësi anglez është lidhur me një rikthim të papritur te Liverpooli, ndonëse raportohet se klubi anglez nuk është i interesuar për të. Edhe Arsenali dhe Manchester City po e përcjellin nga afër situatën e tij.
Megjithatë, sipas gazetarit spanjoll Guillem Balague, Trent do të qëndrojë te Real Madridi të paktën deri në fund të sezonit.
Duke folur për “talkSPORT”, ai shpjegoi: “Jo, ai nuk do të largohet në janar. Ajo që po mendon tani është: ‘Në rregull, ende nuk është koha ime, por do të vijë momenti im dhe unë do të përgatitem për të’. Kështu po e përballon gjithë këtë situatë.
“Por, në pozitën e tij janë dy lojtarë para tij (Valverde dhe Dumfries). Në fakt, edhe Eder Militao u aktivizua si mbrojtës i djathtë kundër Sevillas. Pra, a është ai zgjedhja e katërt? Me sa duket, ai është të paktën zgjedhja e tretë.
“Por ai nuk është dorëzuar. Mourinho i ka thënë të vazhdojë të punojë, sepse do ta ketë momentin e tij.
“Nuk ka qenë e drejtë që, kur ka luajtur nga minuta e parë, është aktivizuar në mesfushë për shkak të mungesave të lojtarëve të tjerë.
“Por, sido që të jetë, ai duhet të vazhdojë të luftojë dhe dëshiron të ketë sukses te Real Madridi, prandaj nuk ka ndërmend të largohet”.
Alexander-Arnold ka kontratë me Real Madridin deri në vitin 2031.
Real Madridi do të rikthehet në fushë më 1 nëntor, kur do të luajë si mysafir ndaj Racing Santanderit.
