Në këtë ngjarje të rëndësishme për vendin tonë i pranishëm ishte edhe miku i Kurtit, ambasadori i Kosovës në Zagreb, Martin Berishaj. Emri i Martin Berishajt tashmë është viral gjithandej Ballkanit Perëndimor për dyshimet që është përfshirë në afera korruptive duke nisur nga Serbia, Sllovenia, Mali i Zi dhe Kosova.
Edhe pse faktet për Berishajn janë të forta, Kurti vazhdon ta mbrojë ambasadorin e tij, me arsyetimin se asgjë nuk është provuar deri më tash për përfshirjen e tij, transmeton Demokracia.
Mirëpo, Kurti ka zgjedhur ta “shkarkojë” sot Martin Berishajn të paktën nga fotografitë që i ka publikuar në llogarinë e tij në facebook ku ka shkruar për Forumin Ekonomik Kosovë-Kroaci.
Në postimin e para një ore, në asnjërën fotografi të Kurtit nuk shihet Berishaj, i cili sot gjatë ditës u pa afër kryeministrit si dikur kur ishin në opozitë.
“Jemi dy vende të lidhura ngushtë me njëra-tjetrën, politikisht, historikisht, por edhe gjeografikisht. Andaj, ka ardhur koha që të forcojmë po ashtu edhe lidhjet tona ekonomike. Bazuar në trendet e shkëmbimeve tona tregtare gjatë viteve të fundit, jemi në rrugën e duhur për ta bërë këtë. Eksportet tona në Kroaci janë trefishuar, ndërkaq importet nga Kroacia janë dyfishuar”, shkroi ndër tjerash Kurti.
