Për këtë ka njoftuar ambasadori gjerman në Kosovë, Jorn Rohde, i cili publikoi edhe pamje nga kjo vizitë.
“Sot shijuam një vizitë tjetër të këndshme në Manastirin e Deçanit, si pjesë e Trashëgimisë Botërore të UNESCO-s, së bashku me 25 kolegë. Në emër timin dhe kolegëve të mi dëshiroj të shpreh mirënjohjen time të sinqertë për Atin Sava për mikpritjen e tij”.
Të shtunën, shefat e misioneve të Francës, Gjermanisë, Italisë, Mbretërisë së Bashkuar, Shteteve të Bashkuara të Amerikës dhe Bashkimit Evropian dolën me një deklaratë të përbashkët me kërkesën për zbatimin e vendimit të gjykatës për pronën në lidhje me Manastirin e Deçanit. Madje, ata thanë se ky është kusht për rrugën e Kosovës në procesin e anëtarësimit në Këshill të Evropës.
“Në maj të vitit 2016, Gjykata Kushtetuese e Kosovës konfirmoi pronësinë e Manastirit të Deçanit mbi disa hektarë tokë. Pavarësisht këtij vendimi juridik dhe kërkesave pasuese, vendimi i Gjykatës nuk është zbatuar ende shtatë vjet më vonë. Ne jemi të bashkuar në mbështetje të së ardhmes demokratike dhe evropiane të Kosovës. Sundimi i ligjit dhe respektimi i pavarësisë së gjyqësorit janë detyrime për të gjitha qeveritë e zgjedhura në mënyrë demokratike dhe parakushte të domosdoshme për integrimin e Kosovës në institucionet evropiane dhe euroatlantike, duke përfshirë përparimin e mëtejmë në aplikimin e Kosovës për anëtarësim në Këshillin e Evropës. Vonesa e mëtejme është vetëm pengesë për këtë përparim”, u tha në deklaratë.
