Zyrtari i Partisë Demokratike të Kosovës, Arben Mustafa ka reaguar pas statistikave të publikuara nga Qeveria e Kosovës, duke përmendur që qytetarët po detyrohen të marrin mbitërheqje për shkak të rritjes së shpenzimeve.
Përmes një shkrimi në Facebook, ai ka thënë se mbitërheqja ka arritur në 1 miliard euro prej kur në pushtet është Qeveria Kurti.
“Detyrimi i qytetarëve dhe bizneseve për të shfrytëzuar mbi 1 miliard euro mbitërheqje (overdraft) nga llogaritë e tyre bankare, prej kur Qeverinë e udhëheqë kryeministri Albin Kurti, është dëshmi e frikshme e përkeqësimit të gjendjes ekonomike në vend.” – ka thënë ai.
Sipas tij, ky produkt bankar ka një normë interesi prej 20 për qind.
“Për t’u përballur me shpenzimet e rritura të jetesës, në kushtet kur të hyrat nuk janë rritur, qytetarët po mbështeten në shfrytëzimin e këtij produkti kreditor bankar që vjen me një normë interesi prej mbi 20%.” – ka shkruar tutje Mustafa.
Ai ka thënë se Qeveria “e akomoduar mirë në luksin e pushtetit” ka harruar rritjen e çmimeve.
“Gjendja e qyterëve të Kosovës sipas të dhënave faktike është rënduar shumë, ndërsa sipas propagandës së qeverisë dhe eksponentëve të VV-së jemi bërë vend për “lakmi”. Kjo qeveri po prodhon propagandë dhe vetëm propagandë – asnjë zgjidhje për problemet me të cilat po ballafaqohen qytetarët!” – ka shkruar në fund zyrtari i PDK-së.
Postimi i plotë:
