Reprezentuesi gjerman u largua nga City në fund të sezonit 2022-23, duke zgjedhur t’i bashkohet Barcelonës në vend që të zgjasë qëndrimin e tij me kampionët e Premierligës. Megjithatë, skuadra e Pep Guardiolës e ka sjellë atë sërish si lojtar të lirë, duke e lidhur me një kontratë njëvjeçare.
Pavarësisht se luajti një rol të rëndësishëm për klubin katalanas sezonin e kaluar, Gundogan iu tha se nuk i ishte garantuar një vend i rregullt titullari nën drejtimin e trajnerit të ri Hansi Flick dhe u vu në dispozicion për një transferim. Pati raportime për interesim nga Arabia Saudite, por ai vendosi të ribashkohej me ish-shokët e tij të skuadrës në Angli.
“Jam jashtëzakonisht i lumtur, i lumtur që shoh shokët e mi të skuadrës, stafin, njerëzit me të cilët kam pasur shtatë vite dhe kam kaluar një kohë të mrekullueshme me të”, tha Gundogan ndërsa u njoftua për kthimin e tij në City.
“Shumë ngritje dhe disa ulje, por një përvojë e pabesueshme. Kur largohesh nga ky vend, kalon një vit larg dhe më pas fillon ta vlerësosh vendin edhe më shumë. E kupton se çfarë kishe, sa e mrekullueshme ishte koha dhe sa i madh ishte klubi. Është Klubi më i mirë në botë dhe unë mendoj se sa i përket futbollit – të rikthehem në atë nivel dhe të rikthehem një vit më vonë është një ndjenjë e jashtëzakonshme, jam shumë i lumtur dhe ndihem i privilegjuar të ndaj sërish dhomën e zhveshjes me këta lojtarë të mrekullueshëm”.
Gundogan kaloi shtatë vjet me Cityn pasi u bashkua nga Borussia Dortmund dhe vazhdoi të bënte mbi 300 paraqitje. Ai fitoi pesë tituj të Premierligë, katër Kupa të Ligës, dy kurora të Kupës FA dhe Ligën e Kampionëve para se të largohej për në Barcelonë.
Kampionët në fuqi të elitës angleze e nisën sezonin e ri me një fitore 2:0 kundër Chelseat javën e kaluar dhe do të synojnë të bëjnë dy fitore radhazi kur të përballen me Ipswich Town të sapopromovuar të shtunën.
