Kryeministrja e Bangladeshit, Sheikh Hasina, e ka siguruar mandatin e saj të katërt radhazi në zgjedhjet e diskutueshme që u mbajtën atje.
Hasina do të jetë në detyrë edhe pesë vjet të tjera pasi partia e saj “Awami League “dhe aleatët e saj fituan të paktën 152 nga 300 vendet parlamentare.
Zgjedhjet u bojkotuan nga opozita kryesore, Partia Nacionaliste e Bangladeshit, e cila ka pretenduar se zgjedhjet janë “mashtrim”.
Rezultati i së dielës vjen pas arrestimeve masive të drejtuesve dhe mbështetësve të partisë opozitare.
“Të pavarurit” fituan 45 vende dhe “Partia Jatiya” fitoi tetë vende. Rezultatet pritet të shpallen zyrtarisht më vonë të hënën.
Ky është mandati i pestë në total për Hasina, e cila për herë të parë u bë kryeministre në vitin 1996 dhe u rizgjodh në vitin 2009, duke qëndruar në pushtet që atëherë.
“BNP është një organizatë terroriste,” u tha ajo gazetarëve pasi hodhi votën e saj. “Unë po përpiqem më të mirën për të siguruar që demokracia të vazhdojë në këtë vend.”
Human Rights Watch (HRW) vlerëson se rreth 10,000 aktivistë u arrestuan pasi një tubim i opozitës më 28 tetor u shndërrua në dhunë, duke rezultuar në vdekjen e të paktën 16 personave dhe plagosjen e më shumë se 5,500 personave të tjerë. Ai akuzoi qeverinë për “mbushjen e burgjeve me kundërshtarët politikë të “Awami League” në pushtet”.
“Awami League” i ka mohuar këto akuza. Frika është ngritur se kjo fitore e re mund të çojë në një sundim de-fakto të një partie.
Shumë pak presin që qeveria të lehtësojë masat e ashpra. Aq më tepër, nëse partitë opozitare dhe grupet e shoqërisë civile vazhdojnë të ngrenë pikëpyetje mbi legjitimitetin e qeverisë.
BNP bojkotoi zgjedhjet pasi “Awami League” hodhi poshtë kërkesat e tyre për një qeveri të pavarur të përkohshme për të kryesuar zgjedhjet, shkruan BBC.
