Për herë të parë në histori janë pesë skuadra italiane në gjysmëfinale të tre garave të UEFA-së, me Interin e Milanin në Ligë të Kampionëve, Roma dhe Juventusi në Ligë të Evropës dhe Fiorentina në Ligë të Konferencës.
Milani dhe Interi kanë një derbi, kështu që një nga skuadrat e San Siros do të jetë në finalen e Ligës së Kampionëve kundër Manchester Cityt ose Real Madridit.
“Nuk mund të them se Milani ose Interi do të humbasin finalen, edhe nëse nuk do të jenë favoritë kundër Manchester Cityt apo Real Madridit”, tha Boniek për Radio 1 Rai.
Juventusi përballet me Sevillën në gjysmëfinalen e Ligës së Evropës, ndërsa Roma përballet me Bayer Leverkusenin.
“Është plotësisht e mundur që ne të shohim një finale tërësisht italiane në Ligën e Evropës, pasi që të dyja sipas mendimit tim fillojnë si favorit të lehtë në gjysmëfinalet e tyre. Kjo do të ishte historike dhe një ngjarje e jashtëzakonshme për të ripozicionuar futbollin italian në skenën e futbollit evropian.
“Fiorentina është gjithashtu në gjysmëfinale të Ligës së Konferencës dhe është plotësisht e mundur që të ketë së paku një përfaqësues italian në të tre finalet e garave evropiane. Kjo do të thotë se niveli i futbollit italian po ndryshon”.
Fiorentina pati një seri prej nëntë fitoresh radhazi në Ligën e Konferencës dhe do të luajë me skuadrën zvicerane, Basel në gjysmëfinale, ndërsa West Ham United dhe AZ Alkmaar luftojnë për vendin tjetër.
Boniek kaloi pjesën më të madhe të karrierës së tij në Itali te Roma dhe Juventus, kështu që ai mbetet shumë afër çështjeve të Serie A-së dhe krenar për kohën e tij atje.
“Unë mbaj anën e Serie A-së dhe shpesh përfundoj duke debatuar me ish-shokët e mi për këtë, se të luash në Itali është liga më e vështirë në Evropë. Nëse mund të luani mirë në Itali, mund ta bëni atë kudo.
“Është e vërtetë që në infrastrukturë kanë nevojë për punë dhe kjo bën që ajo ligë të nënvlerësohet pak, por si një dashnor i Italisë dhe futbollit italian, shpresoj që ata të mund të kthehen në atë që ishin në vitet e 80-ta, si më të mirët në Evropë”.
