Presidenti ukrainas, Volodymyr Zelensky kërkoi sërish sistemet Patriot nga faktori ndërkombëtar. Nëpërmjet një mesazhi në rrjetin social X, Zelensky theksoi se Ukraina ka mungesë të sistemeve të mbrojtjes.
“Ukraina ka qartë mungesë të sistemeve të mjaftueshme të mbrojtjes ajrore, dhe kjo është evidente për të gjithë partnerët tanë. Bota më në fund duhet të ndjejë dhimbjen e shkaktuar nga terroristët rusë në Kharkiv, Kupyansk, qytete të rajonit Donetsk, Zaporizhzhia, rajoni Sumy dhe shumë komunitete të tjera ukrainase.
Ka sisteme të mbrojtjes ajrore në të gjithë botën që mund të ndihmojnë. Vetëm nevojitet vullnet politik për t’i zhvendosur në Ukrainë, i jam mirënjohës vendeve që kanë ndihmuar tashmë. Të qenit aktiv në kryerjen e kësaj detyre është përgjegjësi personale e diplomatëve tanë që punojnë në këto fusha dhe me vendet që kanë sistemet e nevojshme.
Patriot tani duhet të jenë në Ukrainë, kështu që nuk do të ketë nevojë për t’i përdorur ato në të gjithë krahun lindor të NATO-s në të ardhmen.”, tha Zelensky.
