Ekspertja e energjisë, Janina Ymeri, ka ngritur shqetësime serioze lidhur me planifikimin vjetor të energjisë elektrike për vitin 2025, duke theksuar se Zyra e Rregullatorit për Energji (ZRRE) e ka aprovuar Bilancin Vjetor me 13 muaj vonesë.
Sipas Ymerit, dokumenti që përfaqëson planin strategjik për prodhimin, importin, konsumin dhe menaxhimin e energjisë elektrike është aprovuar vetëm më 30 nëntor 2025, ndonëse viti praktikisht ka përfunduar. Ajo thekson se plani ende nuk është publikuar në formën e tij të plotë dhe me të gjitha ndryshimet e nevojshme.
“Pas 13 muajve pritje, ZRRE aprovon bilancin vjetor për 2025, i cili është faktikisht plani për energjinë elektrike. Dhe kjo ndodh në fund të vitit, pa u bërë publik me kohë”, shkruan Ymeri.
Ajo pyet se mbi çfarë baze institucionet po diskutojnë rritje të mundshme të tarifave të energjisë, nëse plani vjetor nuk ka qenë i aprovuar me kohë:
“Pra, tash që viti shkoj pa plan, mbi çfarë baze të aprovuar po mendohet të rritet rryma? Mbi çfarë plani u bë importi, shpenzimi, prodhimi e konsumi i energjisë elektrike gjatë vitit?”
Ymeri gjithashtu shpreh dyshime për çështje që, sipas saj, meritojnë hetim, duke përmendur kompaninë EFT të biznesmenit Vuk Hamovic. Ajo thotë se kjo kompani është dënuar në Rumani, ndërsa në Kosovë nuk i është pezulluar licenca as për një ditë.
Ajo i referohet konfirmimeve të ZRRE-së ndaj Komunitetit të Energjisë në Vjenë se janë duke u zhvilluar hetime, ndërkohë që plani energjetik për vitin 2025 ende nuk ishte aprovuar deri vonë.
“Pavarësisht propagandës, jam përtej çdo dyshimi që në kapacitetet tona bartëse ka bazë për hetim,” përfundon Ymeri në reagimin e saj.
