Barcelona po vazhdon kërkimin për të transferuar një sulmues të ri në skuadër për sezonin 2025/2026, por deri më tani nuk ka arritur të konkretizojë asnjë marrëveshje.
Nico Williams, i cili dukej pranë transferimit në ‘Camp Nou’, ka refuzuar ofertën, ndërsa përpjekjet për Luis Díaz dhe Marcus Rashford kanë hasur vështirësi të konsiderueshme.
Në këtë situatë, klubi mund të orientohet drejt alternativave të tjera.
Aktualisht, Rashford mbetet opsioni më i preferuar, por drejtori sportiv Deco nuk është plotësisht i bindur për transferimin e sulmuesit të Manchester United, dhe për rrjedhojë, negociatat për të mund të pezullohen.
Luis Diaz ishte preferuar më parë, por tani është më pranë transferimit te Bayern Munich, klub që është i gatshëm të ofrojë një shumë më të afërt me kërkesat e Liverpoolit, krahasuar me atë që mund të përballojë Barcelona.
Për këtë arsye, Deco po shqyrton emra të rinj që mund të afrohen, duke i dhënë përparësi operacioneve me kosto të ulët.
Një nga opsionet që ka dalë në skenë është Nicolas Jackson. Sipas raportimeve të CaughtOffside, sulmuesi i Chelseat ka tërhequr interesin e kampionëve të La Ligas.
Jackson, i cili është ndjekur gjithashtu nga Atletico Madrid gjatë muajve të fundit, është një kandidat i fortë për t’u larguar nga Chelsea përpara përfundimit të afatit kalimtar të verës.
Kjo pasi finalisti i Kupës së Botës për Klube ka afruar Liam Delap dhe Joao Pedro si zgjidhje për repartin ofensiv.
Newcastle dhe Aston Villa janë gjithashtu të interesuara, por aktualisht është Barcelona që po tregon më shumë interes konkret.
Me eksperiencën e mëparshme në La Liga me Villarrealin, Jackson shihet si një profil i përshtatshëm.
Aftësia e tij për të luajtur si sulmues i qendrës apo si sulmues i majtë do të ishte një aset i vlefshëm për Barcelonën, dhe nën drejtimin e Hansi Flick, ai ka potencialin për të përmirësuar formën e tij nga sezonet e fundit.
