Patrik Schick thotë se largimi i Granit Xhakës do ta dëmtojë Bayer Leverkusenin më shumë sesa ai i Florian Wirtzit, Jeremie Frimpongut apo Jonathan Tahut.
Leverkusen ka humbur katër nga asetet e tyre kryesore në afatin kalimtar të verës. Wirtz, Xhaka, Jonathan Tah dhe Jeremie Frimpong ishin të gjithë të rëndësishëm në suksesin e klubit kohët e fundit, por të gjithë janë larguar nga ‘Aspirinat’, me tre që janë transferuar në Ligën Premier dhe një që është bashkuar me rivalët Bayern Munich.
Ndërsa Schick beson se Wirtz mund të ketë qenë lojtari më i mirë në skuadër, ai thotë se është udhëheqja dhe përvoja e Xhakës ajo që do të mungojë më shumë.
“Disa lojtarë të rëndësishëm janë larguar: Jeremie, Florian, Jonathan dhe tani Graniti. Pra, lojtarët më të rëndësishëm janë larguar, dhe kjo dhemb, sigurisht. Shpresojmë që të mund të sjellim disa lojtarë të mirë të tjerë. Sepse nuk jemi në një pozicion për të luftuar për titull tani”.
“Për mua si sulmues, Florian Wirtz ishte lojtari më i rëndësishëm. Ai mund të ma pasonte topin dhe krijonte shumë raste për mua. Kjo është një humbje e madhe. Ne nuk mund ta zëvendësojmë Florian Wirtzin”.
“Por Granit Xhaka ishte lojtari më i rëndësishëm për gjithë skuadrën, dhe tani është larguar edhe ai. Ai ishte një lider. Ai ishte lojtari me më shumë përvojë”.
“Dhe thjesht shumë i rëndësishëm për gjithë skuadrën. Shumë gjëra funksiononin mirë me të. Mendoj se kjo është humbja më e madhe”.
“Tani lojtarët e rinj dhe ata që kanë mbetur duhet të tregojnë karakter dhe të japin më shumë nga vetja, sepse tani është koha për lojtarët e tjerë”, ka thënë Schick.
