Will Smith ka reaguar për herë të parë publikisht për lidhjen e tij të supozuar me skandalin e shumëpërfolur të Sean ‘Diddy’ Combs, duke e bërë të qartë se nuk ka asnjë lidhje me akuzat e ngritura ndaj tij. Gjatë një performance në The Observatory North Park në San Diego, aktori dhe reperi i njohur iu drejtua publikut, duke theksuar se nuk është aspak i përfshirë në ngjarjet që përfliten rreth të ashtuquajturave “festa të shthurura” të Combs.

E di që keni parë memet, i kam parë edhe unë,” tha Smith. “Por dua të them diçka shumë qartë: Nuk kam asnjë lidhje me Puffy. Nuk kam qenë në asnjë nga ato festat për të cilat flitet. Kam mjaftueshëm punët e mia, ndaj mos më përfshini në këtë histori.

Smith ironizoi edhe disa detaje të raportuara nga media, duke përmendur akuzat në lidhje me përdorimin e vajrave të trupit në rezidencën e Combs. “As që më pëlqen vaji i trupit,” tha ai, duke e përfunduar fjalimin me humor.

Ndërkohë, Sean ‘Diddy’ Combs ndodhet në paraburgim që prej shtatorit, pas arrestimit të tij në hotelin Park Hyatt në Manhattan. Ai po përballet me akuza të rënda, duke përfshirë trafikim seksual dhe pjesëmarrje në organizata kriminale. Aktualisht, Combs po mbahet në Qendrën e Paraburgimit Metropolitan në Brooklyn, pasi të tre kërkesat e tij për lirimin me kusht janë refuzuar. Gjyqi i tij pritet të fillojë në maj të vitit të ardhshëm.

Sipas avokatit Tony Buzbee, më shumë se 120 persona kanë dalë publikisht me akuza kundër Combs, përfshirë 25 të mitur në kohën e ngjarjeve të pretenduara. Combs ka mohuar të gjitha akuzat dhe ka deklaruar pafajësinë.