Arsenali nuk ka arritur ta ruajë epërsinë e hershme të krijuar prej 2:0 ndaj West Ham United, pasi vendasit u kthyen në lojë për ta barazuar rezultatin, në fund për të marrë një pikë të artë në luftën për mbijetesë.
Për topçinjtë ky është një rezultat jo i mirë, duke parë presionin që ka nga prapa, me Manchester City që tashmë është vetëm katër pikë deficit me një ndeshje më pak të zhvilluar.
Për Arsenalin kjo është ndeshja e dytë me radhë që lëshojnë nga dora një fitore prej dy golave epërsi, për të barazuar në fund, pasi e njëjta gjë ndodhi edhe me Liverpoolin javën e kaluar.
Skuadra e Mikel Artetës e filloi shumë mirë, duke shënuar për 1:0 vetëm pas shtatë minutash lojë me anë të Gabriel Jesus, pas një aksioni të mrekullueshëm.
Tre minuta më vonë, saktësisht në minutën e 10-të, topçinjtë dyfishuan rezultatin me anë të kapitenit, Martin Odegaard, i cili shënoi pas një asistimi të jashtëzakonshëm nga Gabriel Martinelli.
Por vendasit u kthyen në lojë. Ishte Benrahma që shënoi për të ngushtuar rezultatin në 2:1 nga penalltia në minutën e 33-të, që ishte rezultati i pjesës së parë.
Me të filluar pjesa e dytë, Arsenali pati mundësinë të shkonte sërish në epërsi prej dy golave, por Bukayo Saka dështoi të shënonte nga penalltia në minutën e 52-të.
Vetëm dy minuta më pas, ‘Çekanët’ barazuan rezultatin në 2:2 me anë të Jarrod Bowen, për t’i shkaktuar shumë telashe liderit aktual.
Me rezultatin 2:2 përfundoi takimi. Arsenali tani ka katër pikë më shumë se Manchester City, e cila ka një ndeshje më pak, ndërsa West Ham United mbetet në pozitën e 15-të dhe do të luftojë deri në fund për një vend që siguron mbijetesën.