Ditëve të fundit është përfolur goxha se Lëvizja Vetëvendosje, po tenton të ‘peshkojë’ deputetë nga opozita për t’i siguruar numrat për konstituimin e Kuvendit të Kosovës.
Madje ka pasur deputetë nga radhët e Lidhjes Demokratike që kanë deklaruar se VV-ja përmes eksponentëve të tyre iu ka dërguar “selam” dhe iu ka ofruar madje edhe post ministror.
Për këto, sot në emsionin DPT te Fidani ka folur ish-shefja e Grupit Parlamentar të VV-së Mimoza Kusari – Lila.
Ajo këto pretendime i quajti absurde.
“Pse duhet t’i besojmë ne tash Anton Qunit? Secili mundet të thotë nga opozita. Hajt, mos të përmendim emra. Secili deputet i opozitës mund të thotë: “Po edhe mua më kanë ofruar për atë do ta jap votë”. Kjo është absurde bre!”, deklaroi Kusari – Lila në Klan Kosova.
Sot, për herën e 36-të ka dështuar konstituimi i Kuvendit të Kosovës.
Procesi i konstituimit të Parlamentit ka ngecur në pikën e votimit të kryetarit të Kuvendit.
