VV e çel fushatën një ditë para hapjes zyrtare, Cakolli: As KQZ-ja e as PZAP-ja s’mund të shqiptojnë gjoba e as ta mbikëqyrin

Nga nesër, më 13 shtator, nis zyrtarisht fushata zgjedhor për zgjedhjet lokale të 12 tetorit.

Lëvizja Vetëvendosje ka vendosur që hapjen e fushatës elektorale ta bëjë sot, një ditë para, duke nisur në sheshin “Zahir Pajaziti”.

Eugen Cakolli nga KDI ka komentuar këtë, duke thënë se më shumë se për ‘risi organizative’, hapja e fushatës nga Vetëvendosje bëhet për shkak se periudha e parafushatës është e parregulluar ligjërisht.

Rrjedhimisht, Cakolli thotë se Vetëvendosje nuk mund as të mibëkqyret e KQZ-ja dhe PZAP-ja s’mund të shqiptojnë gjoba për shkeljet eventuale.

“Nuk ka qenë praktikë deri më tani që tubimet hapëse të mbahen para fillimit zyrtar të fushatës zgjedhore. Këtë vit, një tubim i tillë po u zhvilloka nga Lëvizja Vetëvendosje. Më shumë sesa për ndonjë risi organizative, kjo lidhet me faktin se periudha e parafushatës është e parregulluar ligjërisht – si në aspektin e gjuhës së përdorur, ashtu edhe të shpenzimeve apo të kufizimeve të tjera. Fushata zyrtare nis nesër, më 13 shtator, dhe deri atëherë çdo aktivitet politik zhvillohet jashtë çdo përgjegjësie ligjore. Kjo do të thotë se, për çfarëdo që ndodh në aktivitetet e parafushatës, as KQZ-ja e as PZAP-ja nuk kanë kompetencë të mbikëqyrin, e rrjedhimisht as të shqiptojnë gjoba apo sanksione – madje as në rast të përdorimit të gjuhës nxitëse/së urrejtjes, apo të shpenzimeve të pakontrolluara”, ka shkruar Cakolli.

Për çeljen e fushatës sot nga Lëvizja Vetëvendosje në Prishtinë më herët ka lajmëruar zëdhënësi i kësaj partie, Arlind Manxhuka.

“Sot, më 12 shtator, Lëvizja VETËVENDOSJE! do të hapë fushatën elektorale për zgjedhjet lokale. Aktiviteti fillon në orën 17:00 në sheshin ‘’Zahir Pajaziti’’ për të vazhduar drejt sheshit “Skënderbeu” në orën 19:00”, njoftoi ai.