Aleksandar Vuçiq vizitoi komunat që janë goditur ditët e fundit nga zjarre të mëdha që kanë kapluar Serbinë.
Gjatë vizitës së tij, u realizua një video që u përhap shumë shpejt në rrjetet sociale, raporton nova.rs.
Ndërsa presidenti serb po fliste me gazetarët, një nga shoqëruesit e tij i dha telefonin, duke i thënë se po e telefonon ministri i Bujqësisë, Dragan Glamoçiq.
“Glamoçiq, për këto fshatra… Prandaj janë të shtrenjta edhe kumbulla edhe qershia, se nuk ka. Edhe vishnje. Po e ndërpres lidhjen sepse nuk jam në qendër të Beogradit, por diku tjetër, Glamoçiq. Hajde, shiko tani vetëm si të ndihmohen njerëzit që janë goditur nga zjarret, ku u ka djegur bagëtitë. Nuk mundemi t’ua kompensojmë të gjithën, por aq sa mundemi, ndihmojini”, dëgjohet duke i bërtitur Vuçiq, ministrit në telefon, ndërsa po xhirohej nga gazetarët.
“Aty ku janë djegur bagëtitë nga zjarret, shiko si t’u ndihmojmë njerëzve. Nuk mund t’u japësh të gjithën, por aq sa mundesh, ndihmoji. Vizito çdo shtëpi. Hajde. Nuk është ‘provo dhe shiko çka mundesh’, por do ta bësh ashtu siç të thashë unë. Jo, more, do ta bësh siç të thashë unë, jo çka mundesh ti. Kjo është përgjigjja. Hajde, tungjatjeta”, shtoi Vuçiq.
Për shkak të më shumë se 100 zjarreve, të martën u shpall gjendje e jashtëzakonshme në pesë komuna serbe, ndërsa zjarrfikësve gjatë natës së të mërkurës u erdhi në ndihmë shiu që nuk kishte rënë për dy muaj, që nga fillimi i majit.
Fshati Dubovë në komunën e Zitorajës është pothuajse i tëri i djegur, ndërsa zjarri ka shkatërruar ose dëmtuar rëndë rreth 300 shtëpi, teksa pronarët e tyre e kanë parë të pafuqishëm se si u digjej pasuria.
