Krahas trendëve të ndryshëm që burim kanë rrjetet sociale, në njëfarë trendi është shndërruar edhe hapja e puseve me ujë të pijshëm nëpër vendet e varfra myslimane në Afrikë dhe Azi.
Nëse lëvizim nëpër faqet e këtyre organizatave në Facebook, shohim që ka një numër të madh të qytetarëve që bëjnë hapjen e tyre, qoftë në emër të vetin apo të familjarëve që nuk jetojnë më.
Trendit i janë bashkuar edhe fytyrat publike.
Në emër të bamirësisë, në hapjen e një pusi me ujë të pijshëm investoi edhe boksieri Robin Krasniqi.
Ai këtë bunar e hapi me emrin e tij në shkurt të vitit 2021.
Bashkë me lajmin e hapjes, në rrjete sociale ai shtoi se duke qenë se uji është elementar për jetën, ndihet i lumtur që arriti ta dërgojë atë edhe te vendet ku ka mungesë.
Përveç boksierit, në pllakën e një ndër bunarëve të hapur u shkrua emri i këngëtarit Shaqir Cërvadiku.
Me ndihmën e fëmijëve të tij, Cërvadiku kishte hapur këtë bunar në Kamboxhia të Azisë, gjatë muajit gusht të vitit 2019.
Ky bunar u jap në emër të tij dhe të gruas së tij të ndjerë.
Në një postim në facebook, ai tha se kjo hapje e bunarit ishte një gjë e mirë sepse nëpër ato vende njerëzit udhëtojnë me kilometra për të gjetur ujë të pijshëm.
KIKS Kosova ka kontaktuar me të dyja figurat publike dhe u ka dhënë mundësinë që të flasin më shumë për këtë iniciativë të tyre, por ata kanë refuzuar të përgjigjen, duke thënë se nuk duan të deklarohen për veprime humanitare.
