Kryetari i Partisë Liberale Egjiptiane, Veton Berisha, është takuar sot me kryeministrin në detyrë, Albin Kurti.
Prej dje, Kurti po takohet me përfaqësues të komuniteteve jo shumicë, për të siguruar numrin e nevojshëm për formimin e qeverisë, shkruan IndeksOnline.
I tillë ishte edhe takimi me Berishën, i cili deklaroi se nuk ka vija të kuqe me askënd në Kosovë, prandaj edhe iu përgjigj pozitivisht ftesës për takim.
Përpara mediave, Berisha tha se para Kurtit shpalosi programin e PLE-së dhe kërkesat e komunitetit egjiptian, duke bërë me dije se kanë kërkuar që të ndikojnë në politikat qeveritare.
“Siç e dini, kryeministri Kurti ka filluar një angazhim të tij për të takuar përfaqësuesit e komuniteteve… edhe ne kemi qenë të ftuar. Normalisht, si parti parlamentare, tashmë e rikthyer në kuvend, pas 4 vjetësh dhe pas shumë padrejtësive që na janë bërë si Parti Liberale Egjiptiane, jemi kthyer dhe kemi qenë në llogaritë e kryeministrit, për me u taku. Biseduam për një bashkëpunim të mundshëm midis nesh. Normalisht, ne si PLE, për shkak të kërkesave tona që janë në raport me zhvillimin e komunitetit egjiptian, në parim, nuk kemi asnjë vijë të kuqe, me askënd. As me kryeministrin Kurti, e as me askënd në Kosovë. Ne i patëm kërkesat tona dhe nëse hyjmë në qeveri, kërkuam që me pasë mundësi që me ndiku në politikat qeveritare”, u shpreh Berisha.
Ndërkaq, ai bëri me dije se PLE-ja do të jetë pjesë e seancës konstituive të 15 prillit, duke thënë se sot nuk u arrit ndonjë marrëveshje konkrete për formim të qeverisë.
“E dorëzuam një program të partisë, që e kemi pasë gjatë fushatës, e që janë nevojat e komunitetit dhe ka mbetur që, në ditët në vijim, të kemi takime prapë, dhe të finalizojmë ato. Ky ishte një takim i parë. Ne do të jemi në kuvend ditën kur mbahet seanca konstituive, ndërsa për pjesën tjetër, sigurisht që do të presim një moment kur të jemi të gatshëm”, përfundoi Berisha.
