Ndërmjetësuesi special i BE-së për dialogun Kosovë-Serbi, Miroslav Lajçak, ka njoftuar për takimin e së premtes me kryeministrin e Kosovës, Albin Kurti, në margjinat e Forumit Ekonomik të Delphit në Athinë të Greqisë.
Lajçak, nëpërmjet një postimi në llogarinë zyrtare në ‘Twitter’, ka thënë se me Kurtin ka diskutuar për normalizimin e marrëdhënieve mes Kosovës dhe Serbisë, shkruan lajmi.net.
Pata një takim të rëndësishem me Kryeministrin e Kosovës, Albin Kurtin, në margjinat e Forumit të Delphit. Ne folëm për problemet aktuale dhe hapat e radhës në dialog drejt normalizimit të marrëdhënieve me Serbinë. Koha për të bërë progres është tani”, ka shkruar Lajçak në ‘Twitter’.
Ndërkaq, nga Zyra e Kryeministrit, me anë të një komunikate për media, bënë të ditur se kryeministri Kurti nga Lajçak kërkoi njohjen e ndërsjellë në kuadër të një marrëveshjeje gjithëpërfshirëse mes palës kosovare dhe asaj serbe.
