Të paktën 14 qytetarë jordanezë kanë vdekur gjatë pelegrinazhit të Haxhit në Arabinë Saudite për shkak të vapës së madhe, thanë zyrtarët.
Ministria e Jashtme e Jordanisë tha se 14 nga shtetasit e saj kishin vdekur “pasi pësuan goditje nga dielli për shkak të valës ekstreme të të nxehtit” dhe 17 të tjerë ishin raportuar të zhdukur.
Sipas agjencisë së lajmeve AFP, pesë pelegrinë iranianë kishin humbur jetën gjithashtu, por nuk specifikoi se si vdiqën.
Zyrtarët jordanezë thanë se kërkimet po vazhdojnë për të zhdukurit.
Në një deklaratë, Ministria e Jashtme jordaneze tha se po koordinohej me autoritetet saudite për procedurat për varrosjen ose transportin e trupave të të ndjerëve, sipas dëshirës së familjeve të tyre, shkruan BBC.
Haxhi është një nga tubimet masive më të mëdha në botë. Më shumë se 1.8 milion pelegrinë po marrin pjesë këtë vit, sipas zyrtarëve sauditë.
Temperaturat tejkaluan 46 gradë celsius këtë javë, duke i bërë shumë nga ritualet që kryhen jashtë dhe në këmbë sfiduese veçanërisht për të moshuarit.
Kreu i qendrës kombëtare të meteorologjisë saudite, Ayman Ghulam, paralajmëroi javën e kaluar: “Klima e pritshme për Haxhin këtë vit do të dëshmojë një rritje të temperaturave mesatare prej 1.5 deri në 2 gradë celsius mbi normalen në Mekë dhe Medinë”.
Haxhi do të përfundojë të mërkurën. Zyrtarët sauditë thonë se si pjesë e masave për zbutjen e nxehtësisë, ata kanë ngritur shumë zona të kontrolluara nga klima. Ata shpërndajnë ujë dhe ofrojnë këshilla për pelegrinët se si të mbrohen nga dielli, transmeton Klankosova.tv.
Ministria saudite e shëndetësisë lëshoi gjithashtu një këshillë, duke u kërkuar pelegrinëve që të qëndrojnë të hidratuar dhe të shmangin qëndrimin jashtë gjatë orëve më të nxehta të ditës midis orës 10:00 dhe 16:00.
Vitin e kaluar, të paktën 240 njerëz vdiqën.
