Përballja e madhe mes dy gjigandëve ka përfunduar. Oleksandr Usyk e përsëriti historinë, duke fituar edhe rimeçin ndaj Tyson Fury, për të fituar tre titujt e peshave të rënda, në Kingdom Arena, të Arabisë Saudite.
Ashtu siç pritej edhe ndodhi. Përballja mes Oleksandr Usyk e Tyson Fury, ishte një duel gjigandësh dhe diçka që të gjithë adhuruesit e boksit duan ta shohin.
Përballja u zhvillua në Kingdom Arena në Riad të Arabisë Saudite.
Kjo luftë ishte si rrjedhojë e duelit të shekullit, ku Usyk kishte fituar ndaj Furyt në përballjen e parë me vendim të ndarë të gjyqtarëve.
Dueli i sotëm ishte përplot emocione, me të dy boksierët që treguan nivel të lartë.
Fury godiste pak por mençur, ndërsa Usyk bënte lëvizje tejet të shpejta, që ishin problem për britanikun 25 kilogramë më të rëndë.
Si përfundim, Oleksandr Usyk e fitoi përballjen me vendim unanim të gjyqtarëve, kështu duke arritur t’i mbrojë tre titujt WBO, WBC dhe WBA në peshat e rënda.
Usyk kështu vazhdon i pamposhtur në peshat e rënda, ndërsa Fury tani ka dy humbje në karrierë, të dy nga ukrainasi.
Vlerësimi raund pas raundi
Raundi i parë u vlerësua si i barabartë, me Tyson Furyn që u koncentrua në goditjet në trup, por që Usyk punoi mirë me lëvizjet e tij për të shmangur një rënie.
Për dallim nga raundi i parë, Fury lëshoi goditje më pak, por ishin efikase, ndonëse Usyk po punoi shumë mirë me lëvizjet e tij. Britaniku fitoi epërsinë me një goditje në fund.
Në raundin e tretë sërish ishte luftë e niveluar, me gjyqtarët që vlerësuan luftën e barabartë.
Usyk arriti ta fitonte raundin e katërt, që ishte i pari për të pozitiv në këtë mbrëmje, duke çuar në total ndeshjen në barazim.
Fury u këndell më pastaj, për të lëshuar një goditje tejet potente, që bëri që ta merrte sërish epërsinë në këtë përballje, duke u vlerësuar fitues i raundit të pestë.
Ruandi më i pastër për t’u vlerësuar ishte ai i gjashti, që dukshëm u fitua nga kampioni i botës në fuqi, Oleksandr Usyk.
Ashtu si në të gjashtin, Usyk u vlerësua më i mirë edhe në tri raundet vijuese, ndërsa Fury fitoi vetëm raundin e 10-të.
Usyk fitoi dy raundet e fundit, për të mbetur kampion i peshave të rënda në WBA, WBC dhe WBO.
