Si pjesë e planit të tij për zhbllokimin e trafikut brenda 18 muajve, Ismaili prezantoi dy nga masat që do të ndërmerren:
– Vendosja e 60 semaforëve të rinj, duke rritur numrin total nga 20 sa janë aktualisht në 80. Kjo, sipas tij, do të mbulojë të gjitha kryqëzimet kryesore, do të shmangë kaosin e përditshëm dhe do të mundësojë menaxhim më të mirë të rrjedhës së veturave.
“Qëllimi nuk është të shtojmë pritjet për qytetarët, por të krijojmë lëvizje më të shpejtë e më të organizuar,” sqaroi ai.
– Krijimi i Qendrës së Menaxhimit të Trafikut, një qendër moderne që do të monitorojë në kohë reale kushtet e trafikut, do të menaxhojë fluksin e automjeteve në hyrjet e qytetit, si dhe do të koordinohet ngushtë me policinë dhe shërbimet emergjente për reagim të shpejtë.
Ismaili theksoi se këto janë vetëm dy nga pikat e planit të plotë për të zhbllokuar trafikun në Prishtinë, plan i cili mbështetet në hulumtime dhe praktika të rekomanduara nga ekspertët vendorë dhe ndërkombëtarë.
“Qëllimi ynë është i qartë dhe i matshëm: brenda 18 muajve, Prishtina do të jetë qytet pa kolonat e përditshme, me lëvizje të rregullt dhe me respekt për kohën e secilit qytetar. Ka ardhur koha për një qeverisje që i jep fund improvizimeve dhe që sjell zgjidhje të prekshme,” tha Ismaili.
Në fund, ai ritheksoi se ky është një prej zotimeve kryesore të platformës së tij për një Prishtinë funksionale, që rikthen normalitetin dhe funksionalitetin në jetën e përditshme të qytetarëve.
Video e konferencës: https://www.swisstransfer.com/
