Shefja e UNMIK-ut, Caroline Ziadeh, në një deklaratë të lëshuar sot është shprehur e shqetësuar me aksionin e djeshëm që rezultoi me mbylljen e strukturave paralele në dhjetë komuna, mes të cilave edhe disa zyre postare dhe qendra të mirëqenies sociale.

Në deklaratën e UNMIK-ut thuhet se mbyllja e tyre mund të ketë ndikim në jetën e qytetarëve të komunitetit serb, të cilët varen drejtpërdrejt nga këto institucione.

Shefja e UNMIK-ut ka thënë se çështjet e pazgjidhura duhet të diskutohen në kuadër të dialogut të lehtësuar nga BE-ja.

Ziadeh përsërit thirrjet e saj që çështjet e pazgjidhura të diskutohen në mënyrë konstruktive, në komunikim të hapur dhe në mirëbesim brenda Dialogut të lehtësuar nga BE-ja. Ajo u bën thirrje të gjithëve që të punojnë drejt zgjidhjeve të negociuara dhe të qëndrueshme për mirëqenien dhe sigurinë e të gjithë njerëzve në Kosovë, si e vetmja rrugë e pranueshme përpara”, thuhet në deklaratë.

Gjatë një operacioni policor të mërkurën janë mbyllur komunat paralele të Serbisë në Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec, Skenderaj si dhe posta e zyre tatimore paralele.

Shtetet e Bashkuara dhe Bashkimi Evropian dënuan veprimet e Prishtinës. Reaguan edhe ambasadat tjera të akredituara në Kosovë