Në raportin e fundit të Misionit të Organizës së Kombeve të Bashkuara në Kosovë (UNMIK), i cili mbulon aktivitetet dhe zhvillimet duke filluar nga data 16 mars deri më 15 shtator 2024, thuhet se situata në pjesën veriore të Kosovës të banuar me shumicë serbe mbetet e tensionuar, kurse potenciali për përshkallëzim të tensionve vazhdon.
Autoritetet e Kosovës që nga fillimi i vitit 2024 kanë mbyllur disa institucione paralele të Serbisë, krahas largimit të dinarit.
Por, lëvizjet janë kundërshtuar nga serbët lokalë dhe një pjesë e komunitetit ndërkombëtar. Gjithashtu, tensionet janë rritur edhe më shumë pas paralajmërime për hapjen e urës kryesore mbi lumin Ibër në Mitrovicë, transmeton albanianpost.
E në raportin e UNMIK-ut është thënë se “veprimet e njëanshme” mund t’i rrisin tensionet dhe të gërryejnë besimin midis komuniteteve dhe institucioneve. Gjithashtu, raporti bën thirrje që Kosova dhe Serbia të rikonfirmojnë angazhimin e tyre në dialogun për normalizimin e raporteve dhe zbatimin e plotë të marrëveshjeve.
“Për më tepër, bëj thirrje për lidership të përgjegjshëm që i jep prioritet mirëqenies dhe të drejtave të njeriut të të gjithë njerëzve në Kosovë. Është e rëndësishme që veprimet e liderëve politikë të reflektojnë një përkushtim për të adresuar nevojat dhe të drejtat e të gjitha komuniteteve”, thuhet në raportin e fundit të shefes së UNMIK-ut.
Në raport përmendet edhe sulmi terrorist i paralamilitarëve serbë në fshatin Banjskë të Zveçanit në shtator 2023, i cili është cilësuar “incident i rëndë i sigurisë” që nënvizon nevojën urgjente që palët të bashkëpunojnë në vënien para drejtësisë të autorëve: “Kjo është thelbësore për rivendosjen e besimit dhe sigurimin e stabilitetit afatgjatë”.
Ndryshe, seanca e radhës e Këshillit të Sigurimit të OKB-së për Kosovën, ku do të shqyrtohet raporti i ri gjashtëmujor për aktivitetet dhe zhvillimet rreth UNMIK-ut i Përfaqësueses Speciale të Sekretarit të Përgjithshëm (PSSP), Caroline Ziadeh, do të mbahet më 30 tetor 2024në New York të Shteteve të Bashkuara të Amerikës (SHBA).
