Ukraina po heton pothuajse 26,000 raste të dyshuara për krime lufte të kryera që nga pushtimi rus dhe ka akuzuar 135 persona, ka thënë për Reuters kryeprokurori i saj për krimet e luftës.
Sipas Yuriy Bilousov, kreu i divizionit të krimeve të luftës të zyrës së prokurorit të përgjithshëm, vetëm 15 nga të akuzuarit janë aktualisht të arrestuar në Ukrainë, ndërsa 120 të tjerët janë ende të lirë.
Trembëdhjetë raste ishin dorëzuar në gjykata dhe shtatë aktgjykime ishin lëshuar, tha ai.
Në maj, një ushtar rus 21-vjeçar i kapur u bë personi i parë që u dënua në një gjyq për krime lufte në Ukrainë që nga pushtimi i Rusisë më 24 shkurt. Ai u dënua me burgim të përjetshëm për vrasjen e një civili të paarmatosur.
“Ndonjëherë ne jemi pyetur pse ne ndjekim penalisht oficerë të tillë … të rangut të ulët. Është vetëm sepse ata janë fizikisht këtu… Nëse gjeneralët do të ishin fizikisht këtu dhe ne do të ishim në gjendje t’i kapnim [ata], ne patjetër do t’i ndiqnim penalisht gjeneralët”, tha Bilousov, njoftoi Reuters.
