UEFA ka raportuar menjëherë për rizgjedhjen e Agim Ademit në postin e presidentit të Federatës së Futbollit të Kosovës, pas mbajtjes së Kuvendit të Rregullt Zgjedhor.
Uebfaqja zyrtare e UEFA-s shkruan se Agim Ademi është rizgjedhur për mandatin e tretë radhazi në krye të FFK-së, duke marrë mbështetjen unanime të delegatëve në Kuvendin e mbajtur të enjten.
Ademi, i cili udhëheq FFK-në që nga viti 2018, ka siguruar kështu një mandat të ri katërvjeçar, duke vazhduar punën për zhvillimin dhe avancimin e futbollit në Kosovë, nënvizon UEFA.
Tutje shtëpia e futbollit evropian ka përcjellë edhe deklaratën e presidentit Ademi pas rizgjedhjes, ku është theksuar rëndësia e besimit të dhënë nga delegatët.
“Vota e sotme është besim për mua dhe për ekipin tim, por mbi të gjitha është vlerësim për punën e bërë bashkërisht dhe përkrahje për rrugëtimin që na pret përpara”, ka deklaruar Ademi, citon UEFA.
