Truproja David Roberts, i cili ka punuar për Whitney Houston nga viti 1988 deri në vitin 1995, ka folur së fundmi për marrëdhënien me këngëtaren e ndjerë. Roberts tha se ishte tunduar dhe dëshironte të hiqte dorë nga gjithçka për t’u bërë i dashuri i saj. Ai tha se u afrua kaq shumë me yllin duke punuar për të.
Filmi i vitit 1992 “Bodyguard” me Whitney Houston dhe Kevin Costner bazohet pjesërisht në marrëdhënien e tyre. “Nëse kaloni këtë kufi, ju humbni objektivitetin tuaj dhe kjo ju bën të rrezikshëm për personin që po mbroni. Kjo është arsyeja pse Frank Farmer (personazhi i Kevin Costner në film) dhe Rachel Marron (roli i Whitney Houston) nuk mund të ishin bashkë. Personazhi në film i kapërceu kufijtë dhe ky ishte fundi i tij, shumica e asaj që ishte në film, ajo dhe unë në fakt e jetuam atë”.
Ai gjithashtu zbuloi se ka ende një shënim që Houston i kishte shkruar më shumë se 35 vjet më parë, duke shtuar se ishte një shënim që ajo la në dhomën e tij të hotelit në Hong Kong në vitin 1988.
