Presidenti i Shteteve të Bashkuara të Amerikës, Donald Trump, përmes rrjetit social “Truth Social” ka reaguar sa i përket hyrjes në fuqi të tarifës universale prej 10 për qind karshi secilit partner tregtarë të SHBA-së gjatë ditës së sotme, duke e cilësuar si revolucion ekonomik, shkruan BBC.
“Administrata po kthen vendet e punës dhe bizneset si asnjëherë më parë. Ky është një revolucion ekonomik, dhe ne do të fitojmë, qëndroni të fortë, s’do të jetë e lehtë, por rezultati në fund do të jetë historik”, ka shkruar Trump.
Sipas tij, Kina ka pësuar më së shumti nga lufta tregtare, si dhe ka theksuar se edhe vendet e tjera e kanë trajtuar keq SHBA-në në aspektin ekonomik.
“Kina është goditur më rëndë sesa SHBA-ja, as nuk është afër. Ata, dhe shumë vende të tjera na kanë trajtuar neve keq. Ne jemi goditur vazhdimisht sepse kemi qenë budallenj dhe të pashpresë, por jo më”, ka shkruar tutje ai.
Më 2 prill 2025, Trumpi shpalli tarifat universale prej 10 për qind mbi të gjitha mallrat e importuara në Shtetet e Bashkuara, e cila hyri në fuqi më 5 prill 2025 (sot). Për disa vende specifike, përfshirë Kinën, u vendosën tarifa më të larta, të ashtuquajtura “tarifa reciproke”, që do të fillojnë më 9 prill 2025.
Arsyet e vendosjes së këtyre tarifave përfshijnë reduktimin e deficitit tregtar, adresimin e praktikave të padrejta tregtare dhe nxitjen e prodhimit vendas.
