Presidenti amerikan Donald Trump ka njoftuar se së shpejti do të takohet me presidentin rus Vladimir Putin në Budapest, Hungari, pas takimit që do të zhvillojë të premten në Uashington me presidentin ukrainas Volodymyr Zelenskyy.
Në një postim në platformën e tij “Truth Social”, Trump tha se “një takim i nivelit të lartë” i këshilltarëve të tij, i udhëhequr nga sekretari i Shtetit Marco Rubio, do të mbahet javën e ardhshme – ndërsa destinacioni ende nuk është konfirmuar, shkruan Fox News.
“Presidenti Putin dhe unë do të takohemi në Budapest për të parë nëse mund ta përfundojmë këtë luftë të turpshme mes Rusisë dhe Ukrainës,” shkroi Trump. Ai shtoi se me Zelenskyn do të diskutojë “për bisedën me Putinin dhe shumë çështje të tjera” gjatë takimit në Zyrën Ovale.
Ky njoftim erdhi vetëm disa orë pasi Rusia goditi qytetet dhe infrastrukturën energjetike të Ukrainës me mbi 300 dronë dhe 37 raketa – shumica të tipit balistik – duke shkaktuar dëme të mëdha në qytetet si Vinnytsia dhe Poltava.
Presidenti ukrainas Zelenskyy akuzoi forcat ruse se po përdorin “taktika terrori të dyfishtë”, duke synuar edhe zjarrfikësit dhe punëtorët e energjisë me dronë “Shahed” të pajisur me municionë kasetë. Ai tha se Rusia “po shfrytëzon çdo ditë të vjeshtës për të goditur rrjetin energjetik të Ukrainës” dhe theksoi se “Putin kupton vetëm gjuhën e presionit – përmes sanksioneve dhe armatimit të avancuar”.
Ndërkohë, Trump nuk e ka konfirmuar ende nëse SHBA do t’i japë Ukrainës raketat me rreze të gjatë “Tomahawk”, që përbëjnë kërkesën kryesore të Zelenskyt. Trump tha më herët se “do të duhet të flasë me Putinin për të parë nëse ai dëshiron që Tomahawk-ët të shkojnë në drejtimin e tij”.
Zelenskyy ndodhet në Uashington për të takuar Trumpin dhe zyrtarë të mbrojtjes e energjisë amerikane, me synim rritjen e presionit ndaj Moskës dhe forcimin e mbështetjes ushtarake për Kievin.
Trump ka paralajmëruar se përveç Tomahawk-ëve, do të diskutohet edhe dërgimi i sistemeve shtesë “Patriot”, ndërsa ka shprehur zhgënjim për faktin që “Putin ende nuk ka ndalur ambiciet e tij luftarake”, pavarësisht përpjekjeve diplomatike që Trump thotë se ka bërë që nga rikthimi në Shtëpinë e Bardhë në janar.
