Gjykata Speciale e Kosovës në Hagë ka kryer disa arrestime në orët e para të mëngjesit të së enjtës.
Deri më tani, Prokuroria e Specializuar nuk ka konfirmuar këto arrestime.
Në këtë aksion raportohet se është arrestuar ish-shefi i Agjencisë së Kosovës për Inteligjencë, Bashkim Smakaj.
Gjithashtu, Specialja ka arrestuar edhe ish-eprorin e UÇK-së, Isni Kilaj.
Lajmin e ka konfirmuar djali i tij, Blend Kilaj, i cili për GazetaDemos ka treguar se arrestimi i babait të tij ka ndodhur rreth orës 7 të mëngjesit.
Ai ka thënë se nuk i di arsyetimet e arrestimit të babait të tij. Kilaj ishte arrestuar nga Specialja edhe në nëntor të vitit të kaluar.
Dhomat e Specializuara të Kosovës atë e kishin liruar në kushte të rrepta sigurie më 3 maj të këtij viti. Lirimi i tij ishte bërë i mundur pasi kushte dhënë garancinë financiare prej 30 mijë eurosh.
Ndërkohë, Fahri Fazliu ka bërë me dije se Gjykata Speciale sot e ka arrestuar babanë e tij Fadil Fazliu, vëllain e dy heronjve të kombit, Fahri e Bahri Fazliu.
Ai ka treguar se arrestimi është bërë sot ne ora 8 të mëngjesit para banesës se tij.
Në profilin e tij në “Facebook”, ai ka shkruar se prindi i tij pritet të dërgohet në Hagë.
“Të nderuar miq, shokë, dashamirë dhe kolegë! Sot, paradite rreth orës 8:00 të mëngjesit para banesës së tij kanë arrestuar babain tim, Fadil Fazliun, luftëtarin e UÇK-së, vëllain e dy heronjve të kombit, Fahri e Bahri Fazliu. Me urdhërë të Dhomave të Specializuara të Hagës është arrestuar dhe pritet të dërgohet për në Hagë. Ballëhapur, kokëlart dhe gjithmonë krenar me të kaluarën tonë të lavdishme!🇦🇱 Krenar me ty Bablok”, ka shkruar Fazliu.
Ndërkohë, për rastin ka reaguar edhe ushtruesi i detyrës së Organizatës së Veteranëve të Luftës së Ushtrisë Çlirimtare të Kosovës, Faton Klinaku.
Ai ka thënë se Gjykata Speciale po e vazhdon gjahun ndaj UÇK-së dhe luftëtareve të lirisë.
“Gjykata Speciale po vazhdon gjahun ndaj UÇK-së dhe luftëtarëve të lirisë. Në media u dha lajmi për arrestimin e Isni Kilajt e Bashkim Smakajt, por sipas informatave që po më vijnë është arrestuar edhe Fadil Fazliu, vëllai i dëshmorëve Fahri e Bahri Fazliu.”- ka shkruar ai në Facebook.
GazetaDemos do t’ju mbajë të informuar për këtë aksion të Gjykatës Speciale.
