Një ngjarje e rëndë ka tronditur mbrëmë fshatin Jabllanicë të Gjakovës, ku tre të mitur humbën jetën pasi u zunë poshtë nga shembja e një shtëpie të pabanuar.

Kryetari i Kuvendit të Kosovës, Glauk Konjufca, ka reaguar lidhur me këtë tragjedi, duke e cilësuar humbjen e jetëve të fëmijëve si “të dhimbshme dhe të papërshkrueshme”. Ai ka bërë thirrje për një hetim të imtësishëm dhe të plotë, në mënyrë që të zbardhen rrethanat e kësaj fatkeqësie.

“Shpreh ngushëllimet e mia për familjarët që humbën më të dashurit e tyre, në këto momente jashtëzakonisht të vështira për ta dhe gjithë shoqërinë tonë. Lutem që ata të gjejnë forcën për ta përballuar këtë humbje kaq të madhe,” ka shkruar Konjufca në ”Facebook”.