Një grua është therur me thikë të shtunën në Fushë-Kosovë, ka bërë të ditur Policia e Kosovës në raportin e saj 24-orësh.
Viktima, e cila kishte pësuar lëndime nga mjeti i mprehtë, fillimisht mori trajtim mjekësor në Qendrën Kryesore të Mjekësisë Familjare, ndërsa më pas u dërgua në Qendrën Klinike Universitare të Kosovës, ku iu nënshtrua operacionit për shkak të gjendjes së rëndë shëndetësore.
Sipas Policisë, lidhur me rastin është arrestuar dhe dërguar në mbajtje i fejuari i viktimës, me të cilin ajo po bashkëjetonte.
Nga vendi i ngjarjes policia ka sekuestruar edhe thikën që dyshohet se u përdor gjatë sulmit.
“Njësitet policore pas pranimit të informatës lidhur me rastin, kanë dalë në vendin e ngjarjes dhe kanë takuar viktimën f/k, e cila dyshohet se kishte pësuar lëndime me mjete të mprehta. Viktima pas tretmanit fillestar mjekësor në QKMF, është dërguar në QKUK dhe i është nënshtruar operimit për shkak të gjendjes kritike të saj. Lidhur me rastin është arrestuar i dyshuari m/k-i fejuari i saj me të cilin ishte duke bashkëjetuar, nën dyshimin se i njëjti është i përfshirë në rast. Njësitet policore në vendin e ngjarjes kanë gjetur dhe konfiskuar një mjet të mprehtë-thikë, e cila dyshohet se është përdorur në rast. Me vendim të prokurorit i dyshuari pas intervistimit është dërguar në mbajtje”, njofton Policia e Kosovës.
