Së paku 12 persona kanë vdekur dhe disa të tjerë janë lënduar në një rrëmujë që ndodhi në një tempull fetar në Indi.
Pelegrinët ishin duke e vizituar të shtunën tempullin e Mata Vaishno Devi në pjesën e Kashmirit që kontrollohet nga India, kur ndodhi tragjedia, shkruan BBC.
Dhjetëra mijëra njerëz zakonisht e vizitojnë këtë tempull përditë dhe mendohet se në këtë kohë ishte kulmi i vizitorëve për shkak të periudhës së festave.
Sipas një zyrtari të lartë policor, 14 persona kanë pësuar lëndime në rrëmujë dhe të gjithë janë dërguar në spital. Kryeministri i Indisë, Narendra Modi, tha se është i pikëlluar nga humbja e jetës së këtyre njerëzve.
Një zyrtar i lartë qeveritar i tha agjencisë AFP se numri i të vdekurve mund të rritet, pasi tempulli ishte jashtëzakonisht i ngarkuar me njerëz që po mundoheshin ta vizitonin atë për Vitin e Ri.
Ende nuk është e qartë se çfarë e shkaktoi rrëmujën në orët e hershme të mëngjesit, por disa dëshmitarë pretenduan se turmat nuk ishin duke u menaxhuar si duhet. Autoritetet kanë nisur një hetim për këtë rast.
