Ky vendim erdhi pasi gjykatësi Smith III kërkoi nga Prokuroria që t’i informojë në rast që munden që ta thërrasin dëshmitarin e planifikuar për të enjten, që të japë dëshmi sa të përfundojë ai i 93-ti, raporton “Betimi për Drejtësi“.
Mirëpo, pas pushimit, prokurori Matt Halling tha se nuk ka mundësi që të bëhet kjo gjë.
Në anën tjetër, gjykatësi tha që sipas të gjitha gjasave nesër nuk do të ketë dëshmitar dhe pritet që të mbahet një konferencë për ecurinë e çështjes, duke filluar nga ora 14:30. Ai tha se nuk do të jetë seancë e gjatë.
Prokurori Halling tha që shpejt do të përfundojnë pyetjet e tij për këtë dëshmitar. Andaj, duke u përgjigjur në pyetjet e prokurorit, dëshmitari Ahmet Rrahmanaj pohoi se Asllan Kleçkën e ka takuar në një rast, por jo me uniformë të UÇK-së.
“Asllan Kleçka ka qenë me një lokal në Malishevë, i cili e ka tepru me alkool dhe ka filluar të bëjë probleme, domethënë të thyejë gotat. Ne kemi kaluar pranë lokalit aty rastësisht dhe si Polici Ushtarake na është kërku që të intervenojmë dhe ta qetësojmë që të mos bëjë probleme”, tha Rrahmanaj, duke shtuar se Kleçka kishte të veshur xhinse dhe jo uniformë.
Ai tha se ishte për befasi për atë në atë kohë për shkak se Asllan Kleçka kishte tatuazhe dhe një qafore me rruza dhe dhëmb të luanit.
Se ai ishte Asllan Kleçka, dëshmitari Rrahmanaj tha se e kishte kuptuar përmes dokumentit të identifikimit, e të cilin më pas e kishin këshilluar që të mos bëjë probleme.
Përpara pushimit, dëshmitari identifikoi pikat që kishte Njësiti ‘Lumi”.
Më pas, Rrahmanajt iu prezantua një video e Fatmir Limajt, ku thoshte se “Njësiti Lumi dhe Çeliku ishin një sepse ishin në komandën e Shtabit të Përgjithshëm dhe se nuk ka ushtri mbi ushtri dhe se ushtria nuk është parti”.
Dëshmitari tha se kjo deklaratë e Limajt kishte ardhur për shkak të situatës që ishte krijuar nga mosmarrëveshjet e ushtarëve të këtyre dy njësitëve.
“Për shkak të raporteve të njësitit Lumi dhe njësitit Çeliku deri në atë kohë”, tha dëshmitari, duke shtuar se ata kanë pasur kundërshti në fillim dhe raporte jo të mira në mes ushtareve të këtyre dy njësiteve
