Pas përfundimit të konsultimeve me liderët evropianë, vëmendja ndërkombëtare zhvendoset drejt takimit të shumëpritur mes Donald Trump dhe Vladimir Putin, që do të zhvillohet sot (e premte) në Anchorage të Alaskës.
Takimi do të mbahet në një bazë ushtarake amerikane, në veri të qytetit më të madh të Alaskës, dhe pritet të jetë një nga momentet më të rëndësishme të diplomacisë ndërkombëtare që nga nisja e luftës në Ukrainë.
Ky do të jetë takimi i parë ballë për ballë mes Trump dhe Putinit që nga viti 2018 në Helsinki, megjithëse të dy liderët kanë komunikuar disa herë nëpërmjet telefonit muajt e fundit, kryesisht për çështjen ukrainase.
Presion ndërkombëtar për armëpushim – por jo në kurriz të kufijve
Gjatë ditës së sotme, liderët e “koalicionit të të vullnetshmëve” – që përfshin Britaninë, Gjermaninë, Francën, Poloninë dhe vende të tjera aleate – i kërkuan Trumpit që të shtyjë Putinin drejt një armëpushimi të menjëhershëm, duke paralajmëruar se sanksionet ndaj Rusisë do të ashpërsohen nëse nuk ka progres të prekshëm nga samiti.
Në të njëjtën kohë, udhëheqës si Sir Keir Starmer dhe Friedrich Merz theksuan se çdo përpjekje për të ndryshuar kufijtë ndërkombëtarë përmes forcës është e papranueshme, një mesazh i drejtpërdrejtë për të kundërshtuar sinjalet e dhëna më herët nga Trump për mundësinë e një “shkëmbimi territoresh” mes Ukrainës dhe Rusisë.
Zelensky nuk merr pjesë në samitin, por një raund i dytë mbetet i mundshëm
Presidenti ukrainas Volodymyr Zelensky nuk do të jetë fizikisht i pranishëm në Alaska, çka ka ngritur shqetësime për përjashtimin e Ukrainës nga bisedimet kyçe. Megjithatë, Trump ka lënë të kuptohet se shpreson të organizojë një raund të dytë negociatash, ku të jenë të pranishëm si Putin ashtu edhe Zelensky, menjëherë pas takimit të së premtes.
Nga ana e tij, Zelensky ka deklaruar se Trump i ka premtuar një bisedë direkte pas samitit me Putinin, dhe se Shtetet e Bashkuara do të vazhdojnë mbështetjen për Ukrainën – edhe pse natyra dhe niveli i kësaj mbështetjeje mbetet për t’u parë pas takimit.
Do ketë “dhënie dhe marrje”, Trump paralajmëron takimin për territoret mes Putin dhe Zelenskyy
Presidenti i ShBA, Donald Trump, tha se ka “25% mundësi” që takimi i tij me Vladimir Putin të dështojë.
“Ky takim po vendos bazat për një takim tjetër”, tha ai për Fox News Radio, transmeton klankosova.tv.
“Takimi i dytë do të jetë shumë, shumë i rëndësishëm, pasi do të jetë takimi ku mund të arrihet një marrëveshje”, shtoi Trump.
Ai theksoi se takimi i dytë i cili mund të përfshijë edhe Volodymyr Zelensky do të ketë “dhënie dhe marrje” mbi kufijtë dhe territoret, edhe pse nuk dha detaje të tjera.Nëse takimi nuk shkon mirë, Trump shtoi se është i hapur për vendosjen e sanksioneve të tjera ndaj Rusisë.
“Po, do të isha, nëse nuk arrihet një zgjidhje”, tha ai.
