Deputeti i Partisë Demokratike të Kosovës, Abelard Tahiri ka thënë se votimi aprovues nga Këshilli i Ministrave i BE-së për liberalizimin e vizave për Kosovën është hap i madh.
Ai gjithashtu e ka konsideruar si hap të vonuar, pasi sipas tij, qytetarët e Kosovë e kanë merituar shumë kohë më parë.
“Urojmë që ky hap, edhe pse i vonuar, të hapë dritaren e perspektivës aq të nevojshme të Kosovës në rrugën integruese”, ka shkruar Tahiri.
Postimi i plotë:
Lajm shumë i mirë votimi aprovues nga Këshilli i Ministrave i BE-së për liberalizimin e vizave për Kosovën. Argumentet rreth meritës së kësaj çështje, janë shterur tash e një kohë të gjatë. Mohimi i paarsyeshëm e kryekëput politik për lëvizjen e lirë të qytetarëve të Kosovës, ka qenë një hallkë e brishtë që është dashur të tejkalohej në mënyrë që të mbizotërojë besimi që shoqëria jonë ka në vlerat qytetëruese e progresive të Bashkimit Evropian. Urojmë që ky hap, edhe pse i vonuar, të hapë dritaren e perspektivës aq të nevojshme të Kosovës në rrugën integruese.
