Komisioni për çështje të Sigurisë dhe Mbrojtjes, nuk e ka votuar rregulloren e punës së komisionerit parlamentar për Forcën e Sigurisë së Kosovës, raporton Ekonomia Online.
Pas propozimeve për ri diskutim të disa pjesëve të rregullores, mbledhja ka vazhduar pa praninë e mediave.
Deputetja e Lëvizjes Vetëvendosje, Shqipe Selimi, paraqiti vërejtjet e saj për këtë rregullore.
“Unë i kam vërejtjet e mia në 7 nene, në disa pika, por mbi të gjitha në gramatikën e kësaj rregulloreje. Gjuha shqipe është pothuajse e bastarduar në disa nene, unë nuk jam njëra nga ato që do ta votojë këtë rregullore për arsyet e mia. Jo vetëm si anëtare e komisionit, dua t’i jap propozimet e mia se si të ndryshohet ajo”, tha Selimi.
E deputeti tjetër i pushtetit, Enver Dugolli, tha se gabimet gjuhësore nuk janë bazë për kundërshtim të rregullores, duke pasur parasysh që deputetët nuk zotërojnë shkollim për gramatikën gjuhësore.
“Jemi munduar të bëjmë me kohën, tashmë jemi ngushtë me kohën dhe nëse mundemi të bëjmë me procedurë të përshpejtuar, nëse nuk miratohet tani në këtë legjislaturë i bie që edhe vitin e ardhshëm të mos ketë funksionalizim të kësaj zyre. Jam i pajtimit që kjo të bëhet në procedurë të përshpejtuar. Ne si grup punues kemi përshpejtuar për të zënë hapin që të miratohet kjo pikë rregullore”, tha Dugolli.
Ndërsa deputeti i Lidhjes Demokratike të Kosovës, Anton Quni ka kërkuar diskutim të çdo neni që gjen kundërshtim nga deputetët pjesëtarë të komisionit.
Sipas tij, ky institucion ka për qëllim që të përcaktohen rregullat dhe metodologjia e punës.
“Pas 10 vjetëve rrugëtimi për të funksionalizuar këtë institucion jemi në përfundim që ky institucion të fillojë punën sa më parë. Si obligim ligjor është paraparë që të harrohet rregullorja e punës së sigurisë së Kosovës. E cila ka për qëllim që të përcaktohen rregullat dhe metodologjia e punës. Ne kemi pasur një vizitë në Norvegji jemi takuar me komisionierin nga forcat e armatosura norvegjeze dhe duke marrë ekspertizat dhe njohurit e e tyre kemi ardhur në një draft të mirë që ky institucion të funksionalizohet sa më shpejt”, tha Quni.
Kurse deputeti Hisen Berisha ka theksuar se duhet hapur rrugë komisioneres së FSK-së.
“Më duket që edhe në strukturë, por edhe në operacionalitet, ngjason kjo zyrë me praktikën më të mirë me përvojat në Gjermani dhe shtete të tjera. Nëse duam që t’ia hapim këtë mundësi komisioneres të veprojë në këtë formë dhe të lehtësojmë punën edhe FSK-së, atëherë kemi menduar që të shkojmë me një procedurë që mbyllet brenda viti”, ka thënë Hisen Berisha.
