Ministri i Brendshëm i Kosovës Xhelal Sveçla ka filluar sot takimet në kuadër të vizitës në Shtetet e Bashkuara të Amerikës, me qëllim të forcimit e bashkëpunimit ndërmjet sy vendeve mike.
Sveçla sot ka takuar Gregory Ducot, drejtorin e Programit të Asistencës së Trajnimit të Hetimeve Penale – ICITAP në kuadër të Departamentit të Drejtësisë dhe ndihmës drejtorin Mark Mogle, Programi i Asistencës së Trajnimit të Hetimeve Penale – ICITAP, për forenzikë.
Ai me këtë rast ka shprehur mirënjohjen e tij për mbështetjen e deritanishme nga shteti amerikan përmes programit ICITAP në Kosovë, i cili ka ofruar mbështetje në kapacitete njerëzore, teknike dhe teknologjike për Ministrinë e Punëve të Brendshme dhe agjencitë e saja.
Ducot dhe Mogle kanë theksuar që Kosova tashmë është një shembull referimi për suksesin e arritur në fushën e policisë dhe forenzikës, të cilat janë model për vendet e rajonit dhe më gjerë.
Ministri Sveçla ka potencuar se Ministria e Punëve të Brendshme duhet të vazhdojë të mbështetet për të arritur standardet në fushën e parandalimit të krimit, menaxhimit të emergjencave dhe rritjes së sigurisë në vend.
“ICITAP u zotua që të vazhdojë bashkëpunimin profesional duke mbështetur institucionet tona në adresimin e nevojave në fushën e sigurisë, luftimit të krimit dhe korrupsionit si dhe sundimin e ligjit”, ka shkruar Sveçla në Facebook.
