Ministri i Punëve të Brendshme, Xhelal Sveçla ka folur edhe njëherë për sulmin terrorist ndaj Policisë së Kosovës në Banjskë të Zveçanit.

Ai për The Guardian është shprehur se ky grup ka ardhur nga Serbia, ata janë të trajnuar, financuar dhe pajisur nga ushtria në Serbi

“Ky grup ka ardhur nga Serbia, ata trajnohen në Serbi, financohen dhe pajisen nga ushtria serbe dhe policia e saj.Një pjesë e armëve është marrë nga magazina e ushtrisë dhe u është dorëzuar terroristëve të ardhur në Kosovë nga Serbia” , u shpreh Sveçla.

Sveçla tha se ministria e tij ndau provat me ambasadat dhe agjencitë perëndimore.

“Ajo që ata donin ishte të pushtonin territorin e Kosovës dhe të hapnin një kanal të ri komunikimi, një rrugë të re nga Serbia në Kosovë”, tha ai dhe shtoi se qëllimi përfundimtar është ndarja e vendit.

Qeveria serbe mohoi përfshirjen në grupin e armatosur, por mbajti një ditë zie për tre të vdekurit.

Kosova thotë se grupi drejtohej nga Milan Radoiçiq, nënkryetar i partisë Lista Serbe e mbështetur nga Beogradi.

Sveçla tha se shërbimi inteligjent i vendit të tij beson se Radoiçiq, i cili është sanksionuar nga SHBA dhe Britania e Madhe, është plagosur dhe po shërohet në spitalin kryesor ushtarak në Beograd.