Ministri i Punëve të Brendshme, Xhelal Sveçla, së bashku me ministrin e Ambientit, Planifikimit Hapësinor dhe Infrastrukturës, Liburn Aliu, ndërrimin e moteve e pritën bashkë me Policinë e Kosovës.
Sveçla dhe Aliu vizituan pikën e kontrollit policor në Urën e Bistricës, stacionet në Jasenovik dhe Kushtovë si dhe Stacionin e Ndërhyrjes së Shpejtë në Jarinje.
Me këtë rast i pari i MPB-së u shpreh i lumturi se e ka përmbyllur një vit me plot suksese.
“Do të vazhdojmë punën e angazhimin tonë me vullnet e përkushtim për të kryer me nder e profesionalizëm misionin tonë të përbashkët që kemi për Republikën dhe për qytetarët tanë”, tha Sveçla.
Postimi i plotë:
Ndjenjë e veçantë gëzimi e krenarie që ndërrimin e motmotit e pritëm në pikën e kontrollit policor në Urën e Bistricës, bashkë me zyrtarët policor që ishin në detyrë dhe me Ministrin Liburn Aliu me të cilin kemi pasur bashkëpunim intenziv në vitin që lamë pas.
Para kësaj vizite në Bistricë, u mblodhëm në Mitrovicë me pjesëtarët e të gjitha Njësiteve që ishin në detyrë, për të festuar vitin e ri ndërsa vazhduam vizitat edhe në stacionet policore në Jasenovik, në Koshtovë dhe në Stacionin e Ndërhyrjes së Shpejtë të Kufirit në Jarinje.
Ndjehem jashtëzakonisht i lumtur që përmbyllëm një vit me suksese të shumta ndonëse të sfiduar jo rrallë herë.
Do të vazhdojmë punën e angazhimin tonë me vullnet e përkushtim për të kryer me nder e profesionalizëm misionin tonë të përbashkët që kemi për Republikën dhe për qytetarët tanë.
